Молитвы об упокоении, чтимые в различных случаях

Господи Боже наш, Владыко живота и смерти! Веруем, яко Ты еси живот и воскресение наше; уповаем, яко аще и умрем, оживем: по Твоему бо непреложному обетованию чаем и воскресения мертвых, и жизни будущаго века. Веруем, яко лежит человеку единою умрети, потом же суд: зане всем нам подобает явитися на судилище Твое и дати ответ в делах, яже кийждо с телом содела или блага, или зла. Вкупе же веруем и исповедуем, яко Ты, Премилосердный и Правосудный Господи, положивый предел покаянию грешных кончиною их, не отвергаеши и наших молений за прегрешения их, приемлеши о них бескровную Жертву и моления Святыя Твоея Церкви, и по молитвам чад Твоих являеши безконечную Свою благость усопшим рабам Твоим; сего убо ради молим Тя, Господи, виждь веру нашу и даждь нам по вере сей: с сею верою и надеждою дерзаем молитися Тебе и просити милости, прощения и оставления грехов усопшему рабу Твоему (рабе Твоей) (имя). Господи, Отче небеси и земли! Единородный Сын Твой, Господь наш Иисус Христос, заповедовал есть нам молитися Ти, ничтоже сумняся, егда рек: «просите и дасться вам, толцыте и отверзется вам и еже аще воспросите от Отца во имя Мое, даст вам»: того убо ради, припадая к Твоему благоутробию, молим Тя, о Премилосердный Господи, молим во имя Единороднаго возлюбленнаго Сына Твоего, Господа нашего Иисуса Христа, не отрини нас от лица Твоего, тепле и слезне молящихся Тебе, отверзи двери милосердия Твоего толкущим нам. Услыши ны, Боже наш, и призри благосердием на душу преставльшагося раба Твоего (преставальшейся рабы Твоея); не внииди, Чеовеколюбче Господи, в суд с рабом Твоим (с рабою Твоею), яко созданием Твоея благости; аще бо беззакония назриши, Господи Господи, кто постоит? Молим Тя со умилением, пощади, пощади, Премилосердный, создание Твое; не осуди раба Твоего (рабу Твою) на вечное мучение; но обаче прости ему (ей) вся прегрешения вольная и невольная, словом, делом и помышлением содеянная; введи его (ю) во Святый Твой град, в селениях праведных учини и жителем рая паки сотвори, яко Ты еси Бог наш, Бог милости и спасения, и Тебе славу возсылаем со Единородным Твоим Сыном и Пресвятым и Благим и Животворщяим Твоим Духом, ныне и присно и во веки веков. Аминь.